منتجات من الدروق ستور افضل تفوز على الهاي براند

Drug Store VS High brand

و نقول بسم الله الرحمن الرحيم ..

 

 

اهلا اهلا بالجميلات .. حبيت اول تدوينة لي تكون في شي احبه و بنفس الوقت الكل يحبه .. منتجات الدروق ستور..

في الفترة الأخيرة شافين كمية التنافس بين الشركات و المنتجات و كل شوي منتج جديد , و ميك اب جديد و تطور سريع ,, بالنسبة لي شركات الدروق ستور ,, افضل بكثير من شركات الهاي براند ,, ليه !! لانه أساسا بعض شركات الهاي براند تملكها شركات الدروق الستور ,, مثال بورجوا تملك شركة شانيل للمكياج ,, جورجو ارماني و رويال كلها من نفس المصنع !!.. ماراح ادخل بتفاصيل الشركات و اتفاقهاتها و و .. المهم غير انه كثييرر مكياج من الهاي براند له مية بديل من الدروق ستور ارخص و اوفر عليك ,, خاصة اذا كنتي من الناس الي تحب التنويع زيي ف بتكون الدروق الستور هي الحب .. و غير كذا ياجميلات لازم تعرفوا حاجة الي هي اذا كان الشيء غالي فهذا مو دليل كافي على ان جودة المنتج عالية.. طيب اليوم بوريكم مفضلاتي في الفترة الأخيرة من منتجات الدروق ستور و بدائلها من الهاي براند و يمكن الدروق ستور افضل بعد ..

 

اول شيء فاونديشن بورجوا هيلثي مكس

 

 من الأساسات الي تناسب البشرات الجافة او العادية او المختلطة زيي .. يعني يناسب اغلب البشرات .. يعطيك لوك نضارة مو مات او مطفي .. و انا بالنسبة لي افضل اللوك الديوي عن المات .. طيب الفاونديشن  هذا من احماض فواكهه يعني ان شاء الله انه مايضر بشرتك و من اسمه هيلثي يعني صحي .. تغطيته خفيفه ل متوسطة .. اذا تبين التغطية خفيفة استخدمي البيوتي بلندر و اذا تبينه اثقل وزعيه بالفرشة بعدين شيلي الزائد بالبيوتي بلندر ..

تقيمي للمنتج : 10من 10 و هذه ثالث علبه اشتريها منه استخدمه يومي و مناسبات لان بشرتي ماتحتاج فل كفر او تغطية قوية

السعر :  سعره تقريبا 90 ريال سعودي

يعد بديل ل: فاونديشن قوتشي

 

درجتي برقم  54

 

 

المنتج الثاني برايمر ميبلين

 

 زي ماهو مكتوب هالمنتج بيبي سكن .. بشرة طفل .. مااقولكم انه تصير بشرتك زي الأطفال .. هذه مبالغة شوي بالوصف .. عموما المنتج فكرته انه يعبي لك المسامات بحيث لو حطيتي فوقه الفاونديشن ماتبان المسامات او الخطوط .. عموما هالنوع من البرايمرات سئ للاستخدام اليومي بس اذا بالمناسبات بيكون ضرره اقل .. بالنسبة لي حبيته جدا احطه عند منطقة الخد و الخشم يخفف لي من المسام و يساعد في توزيع الأساس و تهيئة البشرة ..

تقيم المنتج : 6 من 10 ولا أتوقع اني بشتريه ثاني لاني مااستخدم برايمرات أساسا كثير

السعر : من 30 الى 40 ريال سعودي

يعتبر بديل ل: برايمر ذا برو بروفاشينال من بنفت

 

 الصورة هنا توضح طبيعية البرايمر زي الجل عشان يعمل طبقة على المسام

 

 

   نجي للمنتج الثالث الي هو الكونسيلر

كونسيلر برو ال أي قيرل

 

 

الكونسيلر هذا من افضل  افضل الكونسيلرات الي جربتها بحياتي .. تغطية الكونسيلر كاملة.. فل كفر .. انا عندي الهالات ازمة مو بسبب لونها بس لانه في حفرة تحت عيني و هالحفرة تعطي ظل غامق .. طبعا المكياج يخفف من هالحفرة ولا يشيلها تماما .. اذا صار عندك هالات غامقة او حفرة تحت العين استخدمي كونسيلر غامق (اغمق منك بدرجة او درجتين )  حطيه على الهالات فقط .. بعدين خذي الكونسيلير الدرجة الفاتحة (افتح منك بدرجة او درجتين ) و وزعيه بشكل مثلث تحت العين .. انا اتبع هالطريقة و تخفف من الهالات بشكل مريح و طبيعي .. طيب بالنسبة للمنتج لازم قبله ترطبين ليه ؟ لان النوع ذا فل كفر و نسبة الترطيب فيه مو عالية

تقيم المنتج : 10 من 10 و استخدمه يومي و مناسبات

سعر المنتج : 20-30 ريال سعودي

يعتبر بديل ل : كونسيلر برو لونق من ماك

 

 

الدرجات الي استخدمها برو بيج (الغامقة ) و كريمي بيج (الفاتحة )

 

نجي الحين للبيبي كريم حبيب الكل و صديق الجامعة

بيبي كريم من الف

 

بيبي كريم يعني تغطيه خفيفه .. بس الحلو ان فيه نسبة حماية من الشمس .. و فيه نسبة ترطيب بعد ..

الي اعجبني بذا المنتج انه يعطيك لوك ديوي .. كانك حاطه هايلايت وانتي مو حاطه .. تحسين وجهك فيه نضارة و صحه .. بالنسبة لي انا استخدمه للجامعة او الدوام .. و اذا فيني حبه غطيتها بكونسيلر غامق و ادمج فوقها البيبي كريم ..

تقيم المنتج : 7 من 10

سعر المنتج : 20-40 ريال سعودي طلبته من أي هيرب

يعتبر بديل ل : بيبي كريم ميشا (ميشا ليست من الهاي براند ولكن فيه فرق بالسعر )

 

البودرة السائبة (اللوس باودر ) من NYX

 

 

كلمة بططلله قليله بحقها صدق صدق تجنن حبيتها ممرررهه .. ليه ؟ لانه أولا لونها مايقلب و خفيفة مره ماتحسين فيها ,, و حجمها كبير و يكفي لفترة طويلة .. استخدمها فوق الكونسيلر او فوق منطقة الحبوب اذا بخففها او اذا ابي اخلي الميك اب مات لوك .. طبعا بعد الفاونديشن تحطينها ..

تقيم المنتج : 10 من 10

سعر المنتج : 70-90 ريال سعودي , شريتها من سنتربوينت

تعتبر بديل ل : كارولاين لوس باودر

 

نجي للشادوهات (الظلال ) العشق عند اغلب البنات

أولا شادوهات سليك

 

 

 

جودة عالية و لون واضح و ثبات طويل .. هذه اهم الصفات باي باليت شادو ممكن تشترينه .. و مهم بعد انها ماتتنثر ,, الحلو في منتجات سليك عموما .. الجودة عاليه على ان السعر رخيص ,, حبيت هذا الباليت لان فيه الشيمير و المات ( الامع و المطفي ) و الوانه واضحه من اول مره تحطينه 

 

الباليت هذا زي ماانتو شافين الوانه على وردي و بني ,, مو كثير ناس تحب هالالوان زي الترابيات ,, فيه من نفس الشركة باليت بالوان ترابيه في صيدليه وايتس ..

 

وهذه سواتش للبالت يوضح لكم قوة اللون ومن اول مره طلع اللون ,,

  

النوع الثاني من الشادوهات الي جودتها عالية و سعرها رخيص هي باليتات وايلد اند ويت

 زي ما انتو شايفين في السواشات الجودة تعتبر ممتازة بالنسبة لسعرها .. الي ماحبيته في هذه الشركة انه مافيه تنوع في الألوان حقت الشادوهات ,, و اهتمامهم في فروعهم في السعودية ضعيف فنادر تلقين اللوان الي تبينها .. عموما المنتج كجودة و سعر ممتاز ,, بس بالنسبة لي افضل سليك على وايلد اند ويت ..

 

تقيم المنتجين : سليك 9من 10 سعره : 50-65 ريال

وايلد اند ويت 7 من10 , سعره :20-40 ريال

 

تعتبر بديل ل : باليتات بينفت و ذا بالم

 

شادوهات كلور بوب الشيمر ,,

 

عشق عشق عشق هالشادوهات .. سعرها بطل , ثبات و لون واضح من اول مره و اللون قوي بعد .. حبيتها جد تنفع لمكياج السهرات او المناسبات اكثر لانها يجي فيها لمعة .. بالنسبة للنوع المات منها ماحبيته عاديه و اقل من عاديه ممكن تتقطع على الجفن .. بس النوع هذا صدق يستاهل كل ريال ينحط فيه ..

 

حبيت هالدرجتين لانها غريبة و تنفع للسموكي .. و فيه درجة لالا لونها ذهبي بعد جميللة مرره ..

 

 

تقيم المنتج : 10من 10

سعر المنتج : 27-35 ريال  

تعتبر بديل ل : شادوهات ميك اب فورايفر و ماك

 

نجي الحين للي هبل بالناس و غير ملامح البنات و قص خشوم و نحت خدود ,, الكنتور

باليت كونتور NYX

 

 

 

من الي مايبهره الكنتور ومن البنت الي ماتحبه ,, سواء حطيتيه خفيف او ثقلتيه يحلي المكياج ,, على انه في الفترة الأخيرة صار الستروبنق مسيطر او اللوك الي يعتمد على البلاشر بس دارج و ترند .. بس بالنسبة لي الكنتور مش حتتغير معزته عندي هههههه كاني بالغت شوي .. المهم هذا الباليت من nyx جميل جميل مرره ليش أولا اذا ماعندك أي شادو ولا كنتور ولا برونز ,, اشتري هالباليت يكفيك عنها كلها ,, و غير جودته العالية و يندمج على الوجهه بسرعه و ثابتت ,, كثير ميك اب ارتست اعتمدوه ,, و الى الان اشوفه التوب ,, بس عيبه انه كبير شوي ف يأخذ مكان ومااقدر اخذه معي بالشنطة .. افضل لونين عندي ككنتور الي تحت ثاني واحد من اليسار درجته على رمادي شوي ف حلو للنحت .. و البنانا للإضاءة بعد بطللهه .. خامه الباليت باودر ..

 

 

تقيم المنتج : اكييد 10 من 10 و لو انه يستاهل 100 من عشرة

سعر المنتج : 140 ريال

يعتبر بديل ل : باليت الكنتور الباودر من انستازيا

 

 

و مايزين البنت غير حمرة خدودها ,, نجي الحين للبلاشر ..

 

بلاشر بورجوا باللون المشمشي ,, اللون ذا الحلو فيه انه يناسب اغلب البشرات ,, بالنسبة للمنتج حلو بس مو الأفضل .. بس حبيته عشان حجمه صعنن ينحط بالشنطة و ماياخذ مكان

 

تقيم المنتج : 6من 10

سعر المنتج : 50-70 ريال للأمانة مايستاهل بنات يعني بلاشرات nyx افضل بمية مره و ارخص

 

 

و جاء دور عيونك و حظ العيون الي تناظر عيونك ههه..

ماسكرا بورجوا و ميبلين :

 من اهم الأشياء بالميك اب بالنسبة لي و لاغلب البنات احس الرموش ,, اذا رموشك حلوة ف كله حلو .. جربت كثييرر أنواع ماسكرات الغالي والرخيص الهاي براند و الدروق ستور و وقعت بغرام هذه الماسكرتين بالنسبة لي مالقيت افضل منها

 

 

بورجوا ماسكارا تويست اب ذا فاليوم .. الميزة الي في الماسكرا هذه الفرشة حقتها ,, اثنين في واحد ,, يعني فرشتين بفرشة وحدة ,, يعني تطول و تكثف في ماسكرا واحدة ,, عشان كذا احبها كل الي تبينه بمنتج واحد اش احسن من كذا ,,

 

هذا شكل الفرشه بعد اللف .. طبعا الشعر بلاستك و هالشي احبه في الماسكرا هذه لانه تساعدني اني افرق رموشي بشكل انظف و ارتب ,, هالشكل من الماسكرا مخصص للتكثيف و يعطيك فوليوم اكثر لرموشك ..

 

 

 

لكن بالنسبة لشكلها قبل اللف زي ماهو موضح بالصورة ,, هنا تصير مخصصه لتطويل الرموش ,, اكثر من انها تعطيها كثافة ,,

الحلو بالماسكرا انها ماتتناثر تحت العين فتعطي شكل مو نظيف للميك اب ,,

 

تقيمي للمنتج : 10 من 10

سعر المنتج : 70-80 ريال

 

و نجي لماسكرا ميبلين ذا فولس فاليوم اكسبرس ,,

الي احبه في هالماسكرا تقويسة فرشتها ,, و الشي يساعد اني اخلي رموشي مقوسة اكثر بشكل جميل و حلو ,, لانه اذا كانت رموشك طوال فتكون موقفه على قدام و مايبان طولها بس اذا قوستيها يطلع شكلها اجمل و يبان طولها ,,

 

 

بالنسبة لجودة هالماسكرا برضه عاليه و سوادها فاحم و بطلل ,,

تقيم المنتج : 10 من 10

سعر المنتج : 65 ريال

 

الماسكرتين تعتبر بديل لكثير ماسكرات من كثير براندات منها بينفت و لانكوم

 

 اذا تبين شكل أوسع لعيونك و مصحصح اكثر ف كحليها من جوا ب قلم بيج ,,

زي ذا القلم من فلورا ,,

حطي من النص الي خارج العين و شوفي الفرق بنفسك ,, المنتج بالبداية ماكان عاجبني للامانه و لونه مايوضح و لاهو ثابت بس مع الاستخدام او البري كانه كان فيه طبقة على الكحل و انشالت صار جميل جميل مرره و انقلبت المواصفات ,, واضح و ثابت .. حبيته كثيرر بعد ماكرهته اول ماشريته ,, فلورا تلقونها بمحلات التجميل العادية مو مع براندات الدروق ستور بالصيدليات و سنتر بوينت

 تقيمي للمنتج : 9 من 10

سعر المنتج : 25 ريال

 

 

  و أخيرا وليس اخرا .. الحمر ,, الارواج ,, اللب ستيك ,,

بنات اصحكم اصحكم تروحون تشترون ارواج غاليه ابدا ,, الدروق ستور عاد هنا بدعت صدق بدععتتت كل اللوان موجودة و الجودة كل براند يقول انا الازين .. يعني بدل روج من ديور اجيب ثلاثة من ريميل و الجودة تقريبا نفسها ,,,

 

احب بالارواج المات ريميل و حتى الساتين ,, الي يجي بلمعة شوي ,, الي هي الاثنين من اليمين بالصورة ,, صدق بنات مرره تشبه ارواج ماك ,, و ارخص ب ثلاث مرات ,, و بالنسبة للارواج السايله المات احب nyx و كلور بوب ,, الحلو في كلور بوب انه ثااببتت بس انه ناشف شوي و يشقق الشفايف خاصة اذا مارطبتي قبل ,, لكن nyx مرره ناعمه و ترطيبها عالي و ماتحسين فيها على شفايفك ...

 

 

 هذه سواتش ل ارواج ريميل 101 ساتان الي تجي علبته حمراء ,,

و 08 بطللل للدوام لونه وردي على نود جميل مره على الشفايف , هذا المات الي تجي علبته سوداء ,,

 

 

 

هذه سواتشات للمات السايلة ,, اول واحد من فوق بيبر من كلور بوب ,, لونه نود على موف قوي مره اللون و يصلح يومي و مناسبات

الثاني أبوظبي من nyx , استخدمه كل يوم جميل مع أي محدد يحلي الميك اب مرره و بيعشقونه الي يحبون النود

الثالث ترانستالفنا من nyx حلو للمناسبات مع ميك اب خفيف يطلع اللوك جميل مره

الأسعار : من 30-40 ريال

 

 

و بس شكرا لانكم اعطيتوني من وقتكم ياجميلات ,, و يوم جميل لكم ,, و خلوكم اذكياء بالتسوق ,, لوف يو

اذا حابين تستفيدو اكثر تابعوني على انستقرام وتويتر  :

@Raghadaloun