اخسري 20 كيلو بدون حرمان !! تجربتي مع الدايت و خسارتي ال20 كيلو بسهولة ..

 

شافين كيف تغير المقاس من 14 الى 6!! .. من تجربتي مافيه اجمل من هالشعور ,, انك تلبسين لبس كان ضيق عليك و فجاءة يطيح من وسعه .. و الإحساس الأعظم احساسك بالانجاز ,, بانك شفتي ثمرة تعبك بالحقيقة و الواقع ,, صدق صدق أتمنى لكل بنت تفتح هالصفحة انها تستفيد ولو بنص معلومة ,, و الاحلى لو صار الي تتمنى و حققت هدفها و وصلت للي تبي ,,طبعا مع النحف بنات ماتتخيلون التغير الي بيصير فيك ملامحك تحلو و جسمك ينحت بس بشرط ,, انحفي بصحة !

 

قصتي مع الدايت و الرجميات كانت ماتنتهي ,, من عمري 15 سنة عذبت عمري بالدايت و الحرمان و رجيم دشتي ورجيم التمر واللبن و رجيم كميائي و كل يوم نوع جديد ,, و طبعا التنويع كان بسبب اني ماقدرت اصمل او استقر على واحد منها بسبب الحرمان و التعب الي كنت اعاني منه وانا اجرب ذا و اغير بذا ,,

 

وزني كان 64 ينقص كيلو و يزيد كيلو ,, طولي 160 ,, كتلة وزني طبيعية ,, و جسمي كان متوسط لا سمنة ولا وزن زائد

بس هوس النحف و الرشاقة كان مسيطر علي ,, لدرجة اني كنت اكرهه البس ضيق مع انه مافيه كرشة او زوائد كثيرة ,,

مع انه المفروض الوحدة تكون واثقة من نفسها و مقتنعة و راضية تماما على جسمها الي ربي رزقها هو بصحة و عافية ..

 

 

 بعد معاناة مع الدايت و الرجيم ,, وصلت لمرحلة الملل الاستسلام ,, لاني سنين وانا اسوي دايت و ماتغير شيء !! طبعا السبب ان طريقتي كانت غلط بغلط في تطبيق هالرجميات الخدعة ,, الي تهلك الشخص جسديا و نفسيا و صحته تندمر بسببها ’’

المهم بدا وزني يزيد و ثبت فترة على ال 68 كيلو ,, و رجع يزيد الين جاء اليوم الي وصلت فيه 72 كيلو ,,,

طبعا بالنسبة لي صدمة و انهرت و على طول بديت رجيم تمر و لبن و خسرت ال4 كيلو الي زدتها ,,

و رجع وزني ل 68 بس انه كنت كل ماخربط يزيد بيوم واحد نص كيلو ,, ليه ؟! ,, لاني نحفت بسرعة و النحف السريع هو عبارة عن خسارة للمويات الي بالجسم و بعض البروتين و قليل جدا من الدهون ,, ف باي لحظة ممكن ترجعين كل الي خسرتيه و زيادة بعد ,,

 

بعدها جتني فترة كرهت فيها المطاعم و الاكل بشكل عام و صار اكلي قليل خلال أسبوعين تقريبا ,, وزنت لقيت نفسي خسرت كيلو ,, اوكي مو كثير بس ماحسيت ابدا بالتعب ولا بالحرمان ,, كنت اكل كل شيء احبه و ابيه ,, شوكلت, باستا , برجر و حتى البطاطس المقلي و الشاورما ,, بس مع كذا نحفت ,, و استمر الوضع الى ان خسرت 20 كيلو خلال سنة ,, وجاء اليوم الي وزني فيه صار 52 كيلو ,, الي هو حلم بالنسبة لي ,, و الحمدلله بديت بعدها بنظام صحي اكثر و رياضة اكثر وزني الحالي 55 كيلو و راضية عن نفسي و جسمي بنسبة 100%

 

طيب الزبدة هنا :

عشان تخسرين كل الوزن الي تبينه بدون حرمان او تعب او رجيم عندك هالنقاط امشي عليها و انشاء الله بترضيك النتيجة :

 

1- لا تحرمين نفسك من الاكل الي تحبينه بس استخدمي وصفات صحية اكثر و بكميات معقولة ,, الحرمان يولد الرغبة

2- حاولي أي فرصة تسمح لك انك تتحركين استغليها كويس ,, مثلا رحتوا لحديقة او طلعتوا للبر ,, حاولي انك ماتكونين طول الوقت جالسة قومي امشي نص ساعة ساعة وارجعي اجلسي  وانبسطي ,,

3- اذا جت أيام الجمعات و التخريب ,, عادي ذوقي مافيه مشكلة بس ذوقي ,, خذي لك قطعة شوكلت مثلا مع حبة معجنات ,,

4- اختاري و تنقي من الطبق الي قدامك ,, ايش يعني ؟ يعني قدامك دجاج و رز و سلطة .. تاكلين الكمية الي تبينها من السلطة و الدجاج و سبع لى عشر ملاعق رز ,,

5- اشربي مويه قد ماتقدرين ,, اغصبي نفسك معليه و نزلي تطبيق "water drink reminder" يسوي لك تذكير بشرب المويه ..

6- سمي بالله اشربي كوب مويه و ابداي كلي ,, حسيتي بشويه شبع قومي ماله داعي الزيادة لانه كلها زيادة عن حاجتك ,, وماتفيدك ابداا ,,

7- حاولي تنظمي نومك قد ماتقدرين 8 ساعات باليوم كفاية و جسمك على ماتعودينه ,, لاتقولين  نومي كثير !! اذا عودتي نفسك على النوم الطبيعي بيكفيك و بتكونين نشيطة طول اليوم ان شاءالله ,,

8- دخلي الشوربة ضمن وجباتك ..

9- خففي من السكر بقهوتك و اكلك كله,, ملعقة صغيرة تكفي ,, و فترة و تتعودين و تصيرين ماتقدرين تاكلين الحالي ..

10- رجيم خلال ثلاثة أيام !! النظام الصحي من اسمه نظام يعني نمط حياة يعني شهر شهرين سنة ,, و صدقيني انه ممتع جدا و مو زي السمعة السيئة الي طالعة عنه انه متعب و مهلك ,, الا اذا سويتي من رجميات قوقل الكذابة ..

11- اذا خبصتي مره عادي ترى طبيعي جدا كل الناس تخبص حتى افضل الاخصائين ممكن يخبصون,, فلا تزعلين على نفسك و تنهارين و تخربينها بعدها ,, لا عادي كملي بعدها على نفس نظامك ..

مثال على النظام الي اتبعهه ,, خلال يوم كامل عشان توضح لكم الصورة اكثر :

صحيت الصباح الساعة 6 تقريبا ,, اشرب لي كوب او كوبين مويه ,, اسوي فطوري الي هو توست بر مع اومليت بالخضار مقلي بنص ملعقة صغيرة زيت زيتون ,, و كوب شاي او كوب عصير ,, احليه اما بنص ملعقة سكر او محلي الدايت ستيفا .. الحين رايحة الجامعة او الدوام ,, جات الساعة 11,, وقت قهوتي و طلبت لي لاتيه قليل الدسم ,, و قطعة شوكلت كتكات مثلا أبو اصبعين ماتتعدى سعراته 100 سعره ,, طيب هذا الفطور و السناك الأول خلصناه ,, رجعت البيت الساعة 2 و جاء وقت الغداء ,, و غدانا رز و دجاج و اكيد سلطة ,, اشرب كوب مويه و اكل السلطة و قطع دجاج و احط لي بصحن لحالي عشان لاخلصته أقوم,, 10 ملاعق الى 7 ملاعق رز .. اخذت الغفوة و جاء العصر قمت من النوم جوعانه ,, طيب يمكن يكون جوع كاذب !! او جوع نفسي ,, طيب الحل هنا اشرب كوب مويه انتظر شوي اكل تفاحة مثلا كسناك او برتقالة ,, جات  القهوة على المغرب و الشاي والمكسرات ,, اشربي قهوة عليك بالعافية مع 3 حبات تمر و لو فيه حلا ذوقية عادي ,, خذي لك كوب شاي مع مكسرات ليش لا ,, المكسرات حطيها بحفنه يدك على ذا المقاس كلي منها ,, الحين يله وقت الحركة عاد قومي امشي ,, امشي 5 دقايق و اجري 5 دقايق عشان يزيد الحرق ,, خلصت ساعة رياضة ,, جاء العشاء ماما مسويه شاورما ,, يله نص ماتضر كلي نص ساندوش كفايه ,, وصار وقت النوم و تصبحون على خير ,,

 

 و اسمتعي بجسم انما ايه ,, اسم الله عليك .. و ان شاء الله تكونون استفدتوا من تجربتي و التدوينة

تابعوني على انستقرام و تويتر :

@Raghadaloun